Хипогликемија или низок шеќер во крвта се јавува кога нивото на шеќер во крвта ќе падне под 65mg/dl (3,5 mmol/l).
Ваквата состојба обично се јавува како резултат на прекумерно дозирање со инсулин или со некои таблети за лечење на дијабет.
ХИПОГЛИКЕМИЈА
РАНИТЕ СИМПТОМИ НА НИЗОК ШЕЌЕР ВО КРВТА ВКЛУЧУВААТ:
- Потење (речиси секогаш присутно) проверете дали се потите особено од задната страна на вратот;
- Нервоза, тресење, слабост;
- Екстремна глад и лесно гадење;
- Вртоглавица и главоболка;
- Заматен вид, срцебиење и општа вознемиреност.
АКО ШЕЌЕРОТ ВО КРВТА ПРОДОЛЖИ ДА ПАЃА ПОД 40MG/DL (2,22 MMOL/L) ВАШЕТО ОДНЕСУВАЊЕ МОЖЕ ДА СЕ СМЕНИ. СЕ ПОЈАВУВААТ СИМПТОМИ КАКО ШТО СЕ:
- Неможност да се концентрирате;
- Збунетост и раздразливост;
- Неповрзано зборување;
- Нестабилност кога стоите или одите;
- Грчеви во мускулите;
- Промени во личноста, како лутина или плачење.
Последици на тешка хипогликемија под 20mg/dl или (1,2 mmol/l) се: несвестица, кома или смрт.
ПРАКТИЧНИ СОВЕТИ КАКО ДА СЕ СПРАВИТЕ ВО СЛУЧАЈ ДА ВИ ПАДНЕ ШЕЌЕРОТ ВО КРВТА
- Препознајте ги раните симптоми, можно е да ги немате секогаш истите симптоми, па затоа најдобро е со себе секогаш да ја имате листата на симптоми на низок шеќер во крвта која ви е наведена погоре во текстот и една копија за дома за членовите на вашата фамилија за да можат да проверат доколку ви се слоши во вашиот дом.
- Ако поседувате апарат за мерење на шеќер во крвта, измерете го сами шеќерот во вашата крв доколку мислите дека паднал на ниско ниво.
- Изедете храна која брзо го качува шеќерот во крвта.
Било кој од овие хранливи производи внесени во подолу опишаната количина ќе го покачи шеќерот во вашата крв околу 1.7 mmol/l за околу 15-20 минути.
Течната храна побрзо ќе го качи шеќерот во крвта од цврстата храна:
- Шеќер за готвење една супена лажица;
- Овошен сок 150 мл;
- Млеко со ниска масленост 250мл;
- Мед една супена лажица;
- Џем две супени лажици.
- Почекајте 10-15 минути откако сте изеле храна за брзо качување на шеќерот и ако е можно измерете го шеќерот во крвта повторно. Ако и понатаму е под 65mg/dl изедете уште една доза од храната и изедете нешто што содржи протеини за подолготраен ефект.
- Ако шеќерот во крвта и понатаму ви е под 65mg/dl и станувате се повеќе сонливи веднаш побарајте итна медицинска помош и по можност некој да остане покрај вас додека пристигнат медицинските служби.
